بقلم: نجلاء شكوكو عبدالحميد
حدوتة بلدنا النهاردة جميلة وتقريبا كلنا عارفين إن مصر مليانة بالقصص الكتيرة والحواديت بس الحقيقة مش مجرد اساطير وقصص ملهاش أصل عندنا ووهمية، لا ابدا كلها كانت موجوده بالفعل، تعالوا النهاردة نرجع بالزمن لورا شويه، لا شويه كتير.. التراااام فى مصر وحكاية "السنجة" اللى كانت كل شويه تقع والسواق ينزل يجيبها.
سنة ١٨٩٢ كانت شوارع مصر غير ممهدة وغير مضاءة إلا القليل منها زى الشوارع الرئيسية والكبيرة فقط، والمواصلات كانت عبارة عن الحمار او "العربة الكارو" وكانت ليها مواقف عند فندق شبرد بشارع الجمهورية، وكانت عربية السوارس ايضا وسيلة مواصلات ولكن اغلى سعرا، وكان الناس تعانى من اخلاق العربجية ومن استغلال الحماريين لهم لان الانتقال كان بالنهار فقط، اما ليلا فكانت الشوارع مظلمه، وكل شارع في عزله تامه عن الشارع الاخر.
ولذلك اصبحت كلمه "عربجية" الآن تعنى سوء الاخلاق، وبدأ التفكير من هنا في إنشاء فكرة الترام سنة ١٨٩٢ وخلال سنة وافقت الحكومة المصرية في نوفمبر ١٨٩٣على منح امتياز الشركة البلجيكية على إنشاء ترام سكة حديد. في البداية تم إنشاء 8 خطوط، بداية 6 خطوط كان مركزها ميدان العتبة ومنها القلعة وبولاق والناصرية والعباسية والروضة ومصر القديمة، اما الخطين الاخرين يبدأ منها الشاطئ المقابل الى النيل متجه الى الجيزة، والاخير يبدأ من ميدان قصر النيل متجه الى قطاره الليمون.
وفى الـ ١٠صباحا من اغسطس عام ١٨٩٦ قامت الشركة البلجيكية بتجريب قطار الترام لأول مرة في تاريخ القاهرة، انطلق من بولاق مرورا بالعتبة حتى وصل الى القلعة من خلال شارع محمد علي، وعلى طول هذه المسافة وقف المصريين على الصفين علشان يشوفوا معجزة العصر الجديد، وكانت الاطفال بتجري ورا الترام يرددوا كلمة "العفريت اهو". وقامت جريدة المقطم ودي كانت جريدة مشهورة جدا في الوقت ده بوصف عربة القطار انها تسابق الريح. 
وبعد مرور١١ يوم على التشغيل الرسمي للترام احتفلت الشركة في مقرها ببولاق بحضور الوزراء وكبار رجال الدولة وسفراء الدول، واصبحت الصحف تكتب عن الاختراع الرهيب اللي بيشتغل بالطبيعة.
وفي سنة ١٩٠٣ قامت الشركة البلجيكية بردم الخليج المصري، ومد الترام من السيدة زينب الى غمرة، وكمان تم إنشاء خط اخر يمتد من ميدان باب الحديد الى كوبري شبرا وشارع شبرا، وبيتفرع بعد كده خط اخر الى ساحل روض الفرج. وبعد إنشاء كوبري الملك الصالح وكوبرى عباس تم إنشاء خط من الجيزة الى العتبة مباشرة، وفي سنه ١٩١٢ سنه تم تمديد الخط الثاني المباشر من العتبة الى الجيزة مرورا بكوبرى ابو العلا.
وتم تمديد خط القلعة الى الإمام الشافعي وخط ابو العلا الى روض الفرج، وبعد كل هذه التوسعات في خطوط الترام أصبحت هي الوسيلة الاولى والرئيسية في الانتقال، وبعد العزلة اللي كان يعيشها اصحاب كل حي بفضل الترام بدأ كل حي ينتقل الى الاخر بكل سهولة، وبفضل وجود الترام تم بناء الاحياء الجديدة مثل الزمالك ومصر الجديدة، والإعلانات عن الشقق بدأت ترتفع لوجودها جانب الترام حتى وصلت الى 60جنيه للإيجار.
وطبعا كانت الحماريين والعربجية ضد هذا المشروع تماما، مش بس كده هما كمان حاولوا ينشروا الاشاعات علشان الناس تخاف تركب الترام، ومن اشهر الاشاعات كانت "اوعى تركب الترام احسن الكهربا تفرمك" واستغل بعض النصابين طيبه المصريين وكانوا بيحاولوا يقنعوهم ان ممكن حد يشترى الترماى، وفعلا في حالة نصب حصلت وباع احد النصابين الترماى لواحد من الصعيد، اللي انبهر لما شاف الزحام فاعتقد انه ممكن يكسب كثير من الفلوس، وفعلا اشتراه من النصاب واكتشف بعد كده انه اتنصب عليه، وانتشرت بعد كده جملة "احنا اللي بعنا الترماى".
قصه الترام عاشت أكثر من 100 سنه وبعد كده اختفى، مع انه كان بطل تحويل القاهرة من العاصمة البدائية إلى العاصمة الحديثة اللي إتكلم عنها التاريخ… ودي كانت حكاية بلدنا النهاردة… ومع حكاية جديدة الاسبوع الجاي.
x
